رواية موضوع عائلي الفصل التاسع 9 الجزء الثاني بقلم رحاب القاضي
#موضوع_عائلي
"الجميله والشعر الابيض"
ـ البارت التاسع
ــــــــــــــــــــــــــــــــــــــــ
في تواجُدكِ انا لا اري غيرك في المكان..
وفي غيابكِ انا كفيف يا جميلتي 🤍
ــــــــــــــــــــــــــــــــــــــــ
_ نزلت جهاد من شقة اخوها بعد ما اجبرها تروح لزكريا، بس قبل ما تطلع من العماره رجعت وقعدت علي السلم وفضلت تعيط بحرقه وهي مش عارفه تتصرف ولا تعمل ايه، لفت نظرها اوضه ضلمه تحت السلم فيها كراكيب قديمه، قاامت بسرعه وهي بتبص حواليها بخوف وراحت قعدت فيها وكانت فاكره ان ما حدش شافها..
_بس في الوقت ده شافتها جارتهم الست نورا اللي كانت راجعه من بره وراحت وراها وقالت..
الست نورا
مالك بس يا بنتي ايه اللي مقعدك هنا هو اخوكي مزعلك تاني؟..
قامت وقفت ورمت نفسها في حضنها وقالت ببكاء
انا مش قادره اروح مش هقدر اروح تاني والله انا مش وحشه انا مش عايزة اغضب ربنا مني تاني...
_فضلت الست نورا تهدي فيها واخدتها وطلعو شقتها، وحكتلها جهاد كل اللي حصل وكأنها ما صدقت لقيت حد يشيل عنها كل الهموم اللي جواها ، بس اتعصبت نورا وقالتلها..
ا نورا _
انتي اتجننتي في دماغك ازاي تروحي البيت عند الولد ده وتخليه يعمل فيكي كده؟..
عيطت جهاد وردت عليها وقالت
مكنتش لاقيه مكان تاني اروحله غير هناك يا اما اقعد في الشارع، انا مفيش حد جنبي واللي في الشارع ما كانوش هيرحموني برضو...
نورا بعصبيه
طبعاً لازم تعملي كده ما انتو جيل طلع علي اللي بيشوفو في التلفزيون والنت، الدنيا تخرب في وش البنت من دول تجري تشتغل رقاصه او تروح للحرام، للاسف بقينا نستسهل الحرام، ده انتي كنتي تخلي اخوكي يموتك ولا كنتي روحتي للولد ده وحصل اللي حصل..
_ فضلت جهاد تعيط اكتر، ونورا قعدت جنبيها وقالتلها بحزن علي حالتها..
نورا
بعد كده تجيلي انا هنا، اسمعي يا بنتي انا ربنا ما ادانيش خلفه بس هعتبرك بنتي مدام انتي كمان مالكيش حد بعد ربنا..
_قامت نورا ودخلت جوه ورطعت وفي ايدها فلوس وقالتلها...
نورا
امسكي ادي الفلوس دي لاخوكي، وانا بكره هاخدك معايا علي بعد الضهر كده وهشغلك في مطعم بتاع واحد معرفه كده واياكي تروحي لحد من الاشكال اللي بيعرفها اخوكي دي، ولو جاب حد عنده الشقه الليله دي تيجي تباتي عندي فاهمه..
مسحت جهاد دموعها وقالتلها
انا مش عارفه اشكرك ازاي، انتي ربنا بعتك ليا من السما عشان يرحمني من اللي بيعمله عماد فيا، بس لو صاحبه قاله اني مرحتش اعمل ايه
نورا بضيق ردت عليها وقالت
هو اخوكي ليه ايه غير انه ياخد الفلوس، هو مش قالك يا تجيبي الفلوس يا ما تجيش انتي قوليلو الفلوس اهي وهو مش هيتكلم معاكي..
جهاد بحزن
حاضر يا طنط نورا وان شاء الله لما هشتغل هردهم ليكي والله....
نورا بجديه
مش مهم الكلام ده دلوقتي، المهم انك بكره تصلي الضهر وتجيلي علي طول عشان اوديكي المطعم وتبدأي شغل فاهمه؟..
ردت عليها جهاد لحماس وقالت _
فاهمه حاضر..
_وبعدين خرجت جهاد من عند نورا ودخلت البيت بالمفتاح اللي معاها واول ما شافها عماد زعق فيها وقال....
عماد
انتي هتستهبلي ياا بت مروحتيش ليه عند الراجل اللي مستنيكي....
بصتله من فوق لتحت بقرف وقالت
مروحتش ومش هروح لحد تاني والفلوس اللي عايزها اهي..
مسك عماد الفلوس وهو مبسوط وقال
ايه ده جيبتهم منين زكريا كلمني وقالي انك ما روحتيش اصلا..
بصتله بسخريه وقالت
هيفرق معاك جيبتهم منين اوووي...
اتملت عيون عماد دموع وقالها بضيق
مش بايدي اعمل كده يا جهاد، انا لو مبقاش معايا فلوس اجيب بيها الزفت اللي بقي مالي جسمي ده مش هقدر اتحمل التعب اللي هتعبه، مش هقدر اعيش يا جهاد..
زعقت فيه ببكاء وقالت
ان شا الله عنك ما عشت ولا عملت فيا كده يا شيخ، انا كرهت نفسي بسببك انت واخوك مجدي اللي المفروض انتو رجالتي وتخافو عليا منكم لله ربنا ينتقم منكم...
_سابته ودخلت اوضتها وهو دموعه نزلت بس برضو مرجعش عن اللي في دماغه واخد الفلوس ونزل عشان يجيب بيها اللي عايزه..
ــــــ #بقلم_الكاتبه_رحاب_القاضي ـــــ
_ وفي الاوتيل عند عمار وجميله..
وقف عمار قدام اوضة جميله وهو لابس بدله شيك جداً من غير جرافته وكان وسيم جداً فيها وخصوصاً بالخصله البيضه في في شعره وزيها في دقنه، وقبل ما يخبط علي الباب سمع صوتها وهي بتغني وبتقول..
جميله
ده ولاد الجاحده علقو لوحده ولما شافو صورتي ايدهم اتشلت...
عمار ابتسم بقلت حيله وقال
ده انا اللي هتشل منك والله..
_خبط عمار علي الباب وطلعت في الوقت ده جميله وهو كان متوقع انها كالعاده لابسه هدوم عاديه، بس المره دي كانت غير كل مره بفستانها اللي من اللون الاسود بتصميم هادي، وطويل للارض ولرقبتها كمان ومن غير اكمام وشعرها كان مفرود علي ضهرها وحاطه ميكآب خفيف جداً لايق اووي علي ملامحه..
قربت منه وقالت بثقه
بلاش التتنيحه دي عارفين يا اسطا اننا نسحر ما نتسحرش..
ضحك عمار بهدوء وقالها
هي جميله فين يا قمر؟..
جميله بغيظ
اقولك فين وما تزعلش؟..
ضحك عمار تاني وقالها
هههههه هو انا ما اعرفش اهزر معاكي يعني، وبعدين انتي لحقتي تجيبي الفستان ده امتي؟..
جميله
فيروز قالتلي ان الاجتماع هيكون راقي جداً وانا لازم ابقي متشيكه فروحت جيبت الفستان ده لعلمك ده فستان حفلة التخرج بتاعتي شيلااه من خمس سنين يعني حاجبه اهر فخامه..
عمار بهدوء
عارفه المميز فيكي ايه؟..
جميله بحده
قصدك ايه بميمز دي انت هتتريق..
عمار بغيظ
اتهدي خليني اقول الكلمتين، انا قصدي المختلف يعني..
وابتسم بهدوء وقال
اني بحاول اتعامل مع الكل عادي بس الكل بيعاملني بتصنع لانهم بيبقو ديماً عايزين يبانو قدامي بشكل كويس ويعجبني معادا انتي بتتعاملي بطبيعتك ومش فارق معاكي انا هشوفك ازاي،باختصار انا ومع الكل مهما عملت عمار بيه ومعاكي انتي بكون عموري...
جميله حاولت تداري ابتسامتها وقالت
علي فكره انت برضو بالنسبالي عمار بيه ومديري وعمو عمار مش اكتر..
اتنهد عمار بضيق وقالها
عمو؟!..
جميله بقلق من نظراته
لا اللي تشوفه.. ااايوه عادي يعني انا مش خايفه منك علي فكره...
عمار بغضب
طيب قدامي يا حبيبت عمو، لا قدامي ايه ورايا يا مساعدتي..
ومشي عمار قدامها وهي قالت بغيظ
يارب تتكعبل وانت مااشي يااارب..
عمار بغيظ وهو ماشي
سمعتك ياا جزمه.
_ ضحكت بهدوء وبعدين بصت للطرقه اللي بين الاوض ومسكت في ايد عمار وقالت..
جميله
بقولك ايه انا ممكن اصالحك بس انا اقعد وانت تمسك ايديا وتجرني كده لحد الاسانسير..
عمار بصدمه
نعمم! انتي بتتكلمي جد؟..
جميله
طيب بلاش دي يلا نجري ونشوف مين هيوصل الاول والنبي..
عمار بقلة حيله
بس يا ماما بس يا عسل المكان كله كاميرات وانا عمار المنشاوي مدير الاوتيل، انتي عايزه فضيحتي تبقي بجلاجل..
جميله بغيظ
قفلتني وارتحت انت كده، خلااص انا اصلا مش عايزه منك حاجه..
_ ونزلو تحت ودخلو مطعم راقي جداً، وكان في جزء كبير فيه خاص بالاجتماع ده وكان قاعدين برضو هناك ناس شكلهم اجانب مش مصريين ولا عرب..
جميله
استني الاول قبل ما نخش عليهم اا..
قاطعها عمار
نخش عليهم ايه يا جميله حسني من مخارج ملافظك لو سمحتي..
جميله بغيظ
نتيل ندخل هناك ونقعد معاهم، هما كلهم ملونين كده ما فيهمش حد بيتكلم عربي؟..
عمار ابتسم وقالها
ايوه هما كلهم اجانب في مشكله.
جميله
بص اقسم بالله انا حاجزه كورس انجليزي بعد ما هاخده هبقي لهلوبه..
عمار
عارف انك مش بتعرفي انجليزي كويس مع ان موظفين الشركه عندي بيبقي عندهم لغه واتنين بس انتي مميزه غير الكل..
_ قبل ما ترد عليه قرب من عمار شااب صيني وفضل يتكلم معاه بالانجليزي شويه وبعدين مشي وجميله كانت متنحه عليه..
عمار
في ايه يا جميله مالك؟..
جميله
هو..
عمار
هو مين؟..
جميله
ليمينهوو..
عمار
مين يا اختي؟..
جميله
الواد اللي في المسلسل الكوري..
عمار
بس ده مش كوري ده صيني اسمه نيني شونج..
جميله
لا كوري..
عمار
يا بنتي بقولك صيني..
جميله وعي بتبص للولد بهيام
تؤتؤ ده كوري..
عمار بنفاذ صبر
ورحمة امي صيني صييينيييي هتخليه كوري بالعافيه..
جميله بخوف
انت بتتعصب ليه صيني صيني هو انا يعني كنت هناسبه..
_ اتنهد عمار بضيق وراح سلم علي المستثمرين، وجميله كمان راحت تسلم عليهم وما كانتش عارفه ترد عليهم وقالت بلا مبالااه..
جميله
هاي ماي نيمز كميله..
عمار بغيظ
انتي بتقولي ايه اقعدي ما تتكلميش خالص....
قعدت جميله جنبيه وهي ميلت عليه وقالتله
هي القعده ناشفه ما فيهاش غير تيته اللي قاعده هناك دي..
عمار بصلها بقلق وقال
في ايه يا جميله انا مش عايز افهمك غلط..
جميله
لا لا انا بسأل علي البت الحرمبوءه اللي هتكرش عليك وتنفسن عليا؟..
عمار بعدم فهم
مين دي؟..
جميله
مش متابع روايات انت،خلاص ما تاخدش في بالك كمل كلامك،انا مش فاهمه اصلا انت جايبني هنا ليه؟..
_ ما ردش عليها عمار وفضل يتكلم في الشغل. وجميله كانت قاعده مش فاهمه حاجه منهم وبعدين طلعت موبيلها وكانت مركزه فيه جداً..
عمار
انتي بتعملي ايه يا جميله؟..
جميله
بترجم..
عمار
بترجمي ايه؟..
جميله
بترجم كلامكم اللي مش فاهماه علي جوجل بس انتو بتتكلمو بسرعه اووي..
ضحك عمار وقالها
طيب هعطلك معلش اطلعي هاتيلي الموبيل بتاعي مع السواق بره..
جميله
حاضر..
_ قامت جميله وطلعت وهو فضل مركز عليها وهي ماشيه، واول ما طلعت بره المطعم لقيت السواق واقف وفي ايده علبه كبيره شويه..
جميله
لو سمحت يا عمو، عمار بيه بيقولك عايز الفون بتاعه..
مدليها السواق العلبه وقالها
اتفضلي يا هانم عمار بيه جاب دي عشانك...
_ استغربت جميله اللي بيحصل ومسكت العلبه وفتحتها ولقيت فيها عروسه صغيره شكلها جميل اووي، ابتسمت بدموع وفجأه جه عمار ووقف وراها وقالها..
عمار
اكيد مش هي دي العروسه اللي كنتي عايزاها زمان من باباكي، بس دي حلوه اووي حسيتها شبهك رقيقه وتخطف القلب بسرعه....
بصتله وهي مبتسمه وقالت
بجد شكراً انت فرحتني اووي بيها..
_مسك عمار ايدها وراحو وقفو عند شبااك كبير وقالها بهدوء..
عمار
انا مش جايبك معايا عشان الشغل لان الموضوع كان ممكن يخلص لو بعت اي حد مكاني، بس انا جيت هنا وجيبتك معايا عشانك انتي....
جميله بتوتر
اا انا مش فاهمه انت تقصد ايه؟..
عمار بخبث
تيجي نعمل تيك توك؟..
جميله
نعمم بقي ده كله عشان نعمل تيك توك ليه شايفني شيماء محد...
عمار بعدم فهم
مين دي؟..
جميله
شيمااااء بتاعت علي التيك توك انا هنا التوب..
عمار طلع موبيله وقالها
ما علينا المهم انتي عارفه التريند بتاع علي الدغري؟..
جميله بغيظ
ايوه اعرفه..
اداها عمار موبيله وقالها
طيب يلا امسكي الفون وصورينا..
_ تلقائياً ابتسمت بحماس ومسكت الفون وصورتهم هما الاتنين وعمار بدأ هو وقال.
عمار
علي الدغري...
جميله
علي الدوغري..
عمار بجديه
انا بحبك يا جميله...
_ بصتله بصدمه وفجأه الموبيل وقع من ايدها من الشبااك اللي كانت واقفه عنده وقالت بتوتر.
جميله
انت قولت ايه؟..
عمار بغيظ
الموبيل يا جميله الله يخربيتك عليه كل شغلي..
جكيله بدموع وتوتر كبير
اا انا لازم امشي دلوقتي، اا لازم ارجع البيت عشان ما اتأخرش..
مسك عمار ايدها وقال بهدوء
والله العظيم بحبك من اول مره شوفتك فيها في المدرسه وانتي عجبتيني، رجعت شغلي اليوم ده ومن جوايا كان نفسي اووي اشوفك تاني وده حصل في المطم قدام العريس والحوار اللي حصل بينا، بعدها لقيتني بقنع مامتك تشتغلي عندي عشان كنت عايز اشوفك علي طول قدامي...
جميله بدموع وقلق
ليه انا يعني انت ليك علاقات كتير وتعرف بنات كتير اغني واحلي مني، ليه انا؟..
عمار قرب منها بهدوء وقالها
رأيتُ في أعين الجميع افكارهم.. إلا انتِ رأيتُ في عيناكي قلبي...
ابتسمت جميله وهو قال
بعد الابتسامه دي افهم منها انك موافقه..
_جميله سحبت ايدها من ايده وحضنت عروستها بتوتر وقالت..
جميله
موافقه علي ايه بالظبط؟..
عمار
ما تقلقيش انا مش بتاع كلام، احنا اول ما هنرجع القاهره انا هكلم مامتك وهطلب اتجوزك علي طول..
جميله برقت وقالتله
كمان هتتجوزني؟..
عمار غمزلها بخبث وقال
طبعا مش بحبك...
_ اتكسفت جميله وكانت فعلاً متوتره جداً من فرط المشاعر اللي اول مره تحس بيها في حياتها، وهو ارفق بحالتها وقالها..
عمار بهدوء
طيب اهدي كده وانا هنزل اجيب الموبيل من تحت وجااي..
_ ونزل فعلا عمار وجميله بصت للعروسه اللي في ايدها وابتسمت ، بس فجأه اختفت ابتسامتها البريئه لما سمعت بنتن واقفين في الشباك اللي جنبيها وبيقولو...
_ هو عمار بيه مش كان بطل يعرف اشكال زي اللي واقفه دي؟..
=شكلها عبيطه ومش فاهمه حاجه، اهو اخرها يوم ولا يومين ومش هنشوف وشها تاني معاه،دي عادته هو واخوه زكريا المنشاوي من زمان..
_بس لا البنت شكلها مضحوك عليها، ما تعرفش الماضي بتاع عمار بيه واخوه اللي هنا..
_ نزلت دموعها بحزن وافتكرت ان عمار بيضحك عليها، رمت العروسه من ايدها ومشيت بسرعه وطلعت اوضتها ووقفت قدام المرايا وقالت لنفسها ببكاء..
جميله
بطلي بقي تبقي عبيطه واحد زي ده هيحب فيكي ايه وهيعاملك بالطريقه دي ليه يعني..
_ ولمت حاجتها في الشنطه بتاعتها بسرعه واخدت موبيلها ونزلت...
_واول ما نزلت شافت عمار واقف مع فارس وهما بيضحكو، فاتخبت منه وطلعت من الاوتيل من غير ما يااخد باله منها، ولقيت في تاكسي واقف وقالتله..
جميله
لو سمحت ممكن توصلني المطار او اي مكان ارجع منه القاهره عشان انا ما اعرفش حاجه هنا؟..
بصلها صاحب التاكسي من فوق لتحت وقال
اوي اوي تعالي وانا هوصلك القاهره يا اختي..
جميله اتنهدت بأرتياح وقالت
طيب شكراً جداً.
_ وركبت معاه التاكسي ومشي بيها، وعند عمار طلع للمكان اللي كانت جميله مستنياه فيه ومالقهاش وشاف العروسه اللي جبهالها واقعه علي الارض، فمسكها وراح ناحية اوضة جميله وهو مش فاهم حاجه، وخبط علي الباب بهدوء..
عمار
جميله.. جميله هو حصل ايه وليه مشيتي وكده ترمي الهديه بتاعتي علي الارض..
_ ما سمعش رد منها ورن عليها لقاها عملتله بلووك، وكانت معديه موظفه بتاعت خدمة الغرف فأخد منها المفتاح ودخل اوضة جميله واتفاجئ انها اخدت كل حاجتها ومش موجوده...
_ نزل بسرعه تحت وراح لموظف الاستقبال وقاله بقلق..
عمار
علاء هي البنت اللي كانت معايا هنا طلعت من قدامك..
علاء
ايوه يا عمار بيه خرجت من يجي ربع ساعه كده وركبت تاكسي من بره ومشيت..
عمار بضيق
ايه المتخلفه دي..
_ وراح قعد في الريسبشن وفضل يحاول يكلمها بدون فايده، وفجأه الجو قلب والمطره غرقت المكان وكانت عاصفه شديده، وقف عمار بقلق وكان فعلاً خااايف عليها...
_ وعند جميله كانت راكبه في التاكسي ودموعها علي وشها، ولما حصلت العاصفه بدأت تركز في الطريق وهي خايفه جداً، وخصوصاً لما لقيت السواق ماشي بيها في طريق مقطوع، فسألته بقلق....
جميله
لو سمحت هو انت ليه مش ماشي علي الطريق الرئيسي؟..
السواق بخبث
لاا الطريق دلوقتي خطر فاحنا هنقف في مكان بعيد شويه نرتاح لحد ما العاصفه تخلص واوصلك..
جميله بخوف
انت بتقول ايه يا عم لو سمحت رجعني تاني الاوتيل بسرعه لو سمحت.
السواق ضحك وقالها
ما تخافيش كده وبعدبن ما فيش رجوع المصيده اتقفلت خلاص..
ـ فضلت تبص حواليها بخوف والمكان كان فعلاً شكله مخيف، حاولت تكلم عمار لان ما كانش قدامها غيره بس الشبكه ما كانتش موجوده بسبب الجو اللي قلب ده، وبدون تردد منها فتحت باب التاكسي ونطت منه وكانت الارض كلها مايه بسبب المطره وهدومها كلها باظت وكمان شعرها..
_ قامت واتفاجئت بالسواق بيرجع بالتاكسي لورا فضلت تجري بسرعه وهي ماسكه ايدها اللي كانت بتنذف وبعدين دخلت في مكان كله زرع واراضي زراعيه وراحت قعدت عند شجره بعيده وهي بتعيط وخايفه وكان في صوت كلاب حواليها من كل ناحيه...
_ وبعد شويه عند عمار كان هيتجنن وهو بيحاول يوصل لمكانها او يطمن هي في المطار او فين، وفارس معاه وقاله بسخريه..
فارس
يا عم انت شاغل بالك بيها ليه تلاقيها نزلت في اي كافتريا علي الطريق وقاعده هناك..
عمار بضيق
البنت جايه معايا وامها عارفه يعني لو حصلها حاجه في وشي، وهي مش هتعرف تتصرف لوحدها..
فارس بخبث
هو الموضوع انك خايف عليها عشان امها وبس ولا في حاجه تاني..
عمار بجمود وثبات
ايوه في البنت دي حبيبتي وقريب اووي هتبقي مراتي...
فارس
طيب مش تقول كده من الاول مبروك يا صاحبي..
عمار بضيق
بجد مش وقته انا لازم دلوقتي اعرف هي فين..
_قرب منه في الوقت ده علاء موظف الاستقبال وقاله..
علاء
عمار بيه سواق التاكسي اللي الانسه جميله مشيت معاه رجع بره لوحده اهو..
عمار بلهفه
طيب تعالي معايا وريهولي بسرعه..
_وطلع عمار بره بسرعه ومعاه فارس وعلاء اللي شاورله علي السواق، وراحله عمار وقاله..
عمار
يا كابتن البنت اللي ركبت معاك من شويه وصلتها فين؟..
بصلهم السواق بقلق وقال
ااا مم ما حدش ركب معايا من هنا..
علاء بحده
يا ابني البنت اللي كانت لابسه فستان اسود انا شوفتها بعينيا وهي بتطلع معاك..
السواق بتوتر
مم ما حصلش..
مسكه عمار من هدومه وقال بعصبيه
انطق يالا وديتها فين؟..
فارس
احسنلك تقول وديتها فين ده عمار المنشاوي مدير الاوتيل واللي كانت معاك دي خطيبته..
خاف السواق وقال
والله العظيم يا باشا هي خافت من الطريق ونطت من العربيه انا حاولت ادور عليها بس اختفت ومالقتهاش..
اتنفض قلب عمار بخوف كبير عليها
الطريق ده فين بالظبط؟..
السواق
بعد طريق الاوتيل بالظبط، بس الطريق المقفول..
عمار بعصبيه
بقي هي اللي كانت خايفه من الطريق يا ابن ال..
فارس بقلق
خلاص يا عمار عشان الناااس..
عمار
خلي الواد ده معاك ما تسيبوش غير لما ارجع..
فارس
طيب اجي معاك طيب؟..
_ ما ردش عليه عمار وبسرعه اخد عربيته وراح المكان اللي قاله علي السواق، وكان طريق طويل بس اخره مقفول فضل ماشي بالعربيه لاخره ومالقهااش برضو، فنزل من العربيه وفتح كشاف موبيله وفضل يدور عليها في الطرق الجانبيه اللي في الطريق وكان فيهم طريق زراعي، مشي فيه وفضل ينادي عليها وبرضو ما عرفش يلاقيها، وكان لسه هيمشي بس سمع صوت خطوات ورااه بص وراه بسرعه ولقاها هي ابتسم بتنهده وقالها..
عمار
وقعتي قلبي عليكي منك لله..
_ كانت بتبصله بدموع وهي حاطنه نفسها وجسمها كله بيتنفض من البرد، وفجأه وقعت علي الارض فاقده الوعي، جري عليها عمار بسرعه وقالها بدموع..
عمار بخوف حقيقي
جميله ردي عليا انا اسف اني سيبتك والله ما هسيبك لوحدك تاني، جميله..
_ وشالها بسرعه واخدها بعربيته ووداها المستشفي..
ــــــ #بقلم_الكاتبه_رحاب_القاضي ــــــ
_ وتاني يوم الصبح..
فتحت هناء باب البيت بتاع يونس ولقيته نايم علي السلم بتاع البيت بصتله بحزن وقعدت جنبيه علي الارض وقالتله..
هناء
يونس قوم يا ابني يلاا..
يونس فتح عيونه وقام وقال
فيكي الخير والله انك هتخليني ادخل اجهز وافطر في بيتي..
هناء بضيق
ضهرك وجعك من نومة الارض مش كده؟..
قام يونس وقالها بسخريه
لا عادي انا لما كان عندي عشر سنين كنت في عز البرد بنام في الشارع..
هناء بحده
ابوك السبب علي فكره؟..
ابتسم يونس وقال
انا مش قصدي الومك، بس والله كنت بتخيل نفسي نايم في حضنك عشان اقدر انام يا ماما هناء..
هناء بدموع وحزن
روح غير هدومك واجهز وانا هكون جهزتلك الفطار، عشان قبل ما تروح شغلك هتعدي تاخد ولادك من عند. شهد توصلهم المدرسه انا كلمتها وقولتلها..
يونس بضيق
بس انا مش فاضي ولازم اروح الشركه..
هناء بسخريه
بس انت لازم تعمل واجبك معاهم، علي الاقل عشان ما يتخيلوش وجودك وانت غايب عنهم..
يونس
طيب عايز قهوه علي الفطار مش شاي..
هناء
هو انا الشغاله بتاعت اللي جابك، وبعدين لا طبعا القهوه وحشه علي الفطار عملالك لبن..
يونس
شيفاني قطه قدامك يا حجه انا عايز قهوه، بصي هعملها لنفسي..
هناء بحده
انا اللي اعمله يتاكل ويتشرب وانت حاطط جزمه في بوز ابوك..
يونس بغيظ
هو انتي ايه اللي جابك في وشي اصلا..
هناء
هو انا ما قولتلكش انا ناويه اقعد معاك لحد ما اروح لابوك..
وقالت بضيق
لا لا ابوك تلاقيه بشيش مع ابو لهب انما انا ان شاء الله هدخل الجنه..
_وفعلا يونس سمع كلامها وراح جهز وشرب اللبن وراح بيت شهد عشان ياخد ولاده يوصلهم المدرسه..
_ ونزلت شهد ومعاها الولاد وكانت لابسه بجامه طويله وحاطه حجابها، ويونس قرب منهم وحضنه يوسف ويزن كانت ماسك ايد شهد ومدايق جداً..
يونس
مش هتيجي تسلم علي بابا وتحضنه يا يزن..
مسك يزن شهد اكتر وقاله
لا انا عايز اا اا اروح مم مع ماما....
شهد قعدت قدامه علي الارض وقالتله
مش احنا اتفقنا انك تروح مع بابا عشان هو ما يزعلش..
يزن بدموع
يروح مع يوسف انا عع عايزك انتي..
يونس بجمود
اطلعي اجهزي يا شهد بسرعه عشان نوصلهم سوا..
شهد بجديه
خلاص روح انت مع يوسف وانا هبعت يزن مع ايتن جارتنا هنا هي في نفس المدرسه معاه بس في الثانويه..
يونس قرب منها وقال بهدوء
معلش بس انا عايزه يجي معايا..
_ اتنهدت شهد بضيق وطلعت فوق عشان تجهز وتنزل ويونس اخد ولاده معاه العربيه وقال ليزن..
يونس
هي مايا لسه في الحضانه يا يزن..
يوسف رد عليه وقال
قصدك ميس مايا الحلوه..
بصله يونس بغيظ
بس يا حبيبي عيب، وما فيش احلي من امك، ها يا يزن ما رديتش عليا؟..
يزن بضيق
لا مم ما بقتش تيجي..
يونس
طيب كويس..
_نزلت شهد وكانت هتركب جنب ولادها بس يوسف قالها برجاء..
يوسف
عشان خاطري يا ماما اقعدي جنب بابا زي بابا وماما بتوع صحابنا..
_يونس فتحلها الباب بسرعه وابتسم بهدوء، وهي عشان ما تحسسش ولادها بحاجه قعدت قدام جنب يونس، وقام يوسف وقاله بصوت واطي..
يوسف
اي خدمه بقي يا كبير..
يونس ضحك وقاله
بس يا لمض اقعد جنب اخوك..
_ فضل يوسف يضحك ويزن بصلهم بحزن وفضل قااعد ساكت، وبعد شويه وصلو المدرسه ويزن باس شهد ونزل ويوسف باس يونس وحضنه وقال..
يوسف
انت هتخلينا نرجع البيت تاني امتي با بابا انا مش عايز اقعد في بيت خالو..
يونس بص لشهد بضيق ورد عليه وقاله
هخلص شغل مهم عندي وهاجي اخدكم، يلا بقي انزل عشان ما تسيبش اخوك لوحده ولو ميس مايان دي رجعت المدرسه ابقي قولي تمام..
بصتله شهد بحده ويوسف قاله
حاضر سلام يا شوشو..
نزل يوسف وشهد قالت بحده
ممكن تخلي ولادي بعيد عن القرف ده؟..
يونس بهدوء
انتي مش فاهمه حاجه يا شهد فاسكتي..
شهد بسخريه
بالعكس انا بقيت فاهمه كل حاجه كويس..
جات تنزل بس هو مسك ايدها وقالها بهدوء
والله العظيم وحشتيني، عارف ان ما ينفعش دلوقتي بس انا من غيرك ولا حاجه يا شهد..
سحبت ايدها منه وقالت بحده
بطل كدب عشان ما تقلش من نظري اكتر من كده..
قالت كلامها ونزلت من العربيه وهو كمان وقالها
انتي رايحه فين انا هوصلك للبيت اركبي..
شهد بحده
لا شكراً كتر خيرك انا جيت معاك عشان الولاد غير كده انا ما فيش اي حاجه هتجمعني بيك..
_جات تمشي بس رجعت تاني ووقفت قدامه وقالت بنبره حزينه...
شهد
هي لو كانت نور مكاني انت كنت هتخونها وتهملها وتعاملها زي ما كنت بتعاملني مؤخرا؟..
_سكت يونس وما عرفش يرد عليها وهي قالتله بهدوء..
شهد
عارف الحلو في بُعدي عنك انه خلاني اصدق حاجات كتير كنت بحاول اقنع نفسي زمان انها مش صح بس طلعت صح جداً..
_ قالت كلامها وسابته ووقفت تاكسي ومشيت، وهو ركب عربيته وكرر لنفسه سؤالها تاني، لو كانت نور مكانها هو كان هيخونها؟..
_اتنهد بضيق ومشي هو كمان علي شغله والاجابه علي السؤال محيرااه ومش عارف يرد حتي علي نفسه...
ـــــــ #بقلم_الكاتبه_رحاب_القاضي ـــــــ
_ وعند عماد كان عند زكريا في شقته وقاله.
عماد
اهي دي كلها الحكايه بس خلاص هي قالتلي انها هتشتغل وتديني فلوس لحد ما انا الاقي شغل..
زكريا بجمود
اممم يعني مش هتيجي تاني..
عماد بضيق
ايوه يا زكريا ولو سمحت كفايه تجيب سيرة الموضوع ده انا بضرب نفسي ب100 جزمه اني ضيعتها بدل ما احافظ عليها..
ضحك زكريا وقاله
هههههه يا ابني انت لو اتزنقت في قرشين انت بنفسك هتجيبهالي لحد هنا..
عماد بدموع
عشان الزفت اللي بقيت باخده بسببك، انت اللي عرفتني علي عزيز وخلتني اشتغل معاه وزي ما بيقولو طباخ السم بيدوقو....
زكريا
بقولك ايه انا مش ناقص صدااع انت جاي عايز ايه؟....
عماد
ارجع عند عزيز عشان اقدر اجيب مصاريفي حتي..
زكريا
طيب استني هقوم اغير هدومي ونروحله سوا..
_ وفعلا بعد شويه كان زكريا وعماد عند راجل من اصحاب الاعمال المشبوهه، وقال لزكريا..
عزيز
حلو الكلام ده خلاص يا عماد قوم اقف مع الرجاله كفايه ان زكريا بنفسه جاي معاك..
عماد
ربنا يخليك لينا يا معلم عزيز..
ومشي عماد وعزيز قال لزكريا
بقالي شويه عايز اوصلك مش عارف..
زكريا
كانت عندي مصلحه بخلصها، خير في ايه؟..
عزيز بثقه
عمليه جديده بمليون دولااار..
زكريا بأهتمام
تمام قولي مين وامتي وانا والرجاله هنخلص الليله كلها...
عزيز
حلو الكلام بس اصبر علي رزقك مش بالسهوله دي، اصلها مختلفه شويه..
زكريا
ازاي يعني؟..
عزيز
انا اختارتك عشان انت قلبك ميت وهتعرف تخلص الموضوع، الحكايه ان في واد صحفي بيخبط في حاجات مش لازم حد يقرب منها..
زكريا بجمود
اممم طيب ما نقرصله ودنه وخلاص..
عزيز
حلو الكلام اهو ده المطلوب بس مش علقه ولا نخربله حاجه عربيته ولا بيته لا، احنا هنقتله ابنه عنده عشر سنين..
زكريا بقلق
اييه من امتي بنقتل عيال صغيره؟..
عزيز ضحك ورد عليه
هههههههه انت هتعملي فيها حنين ده انت قتال قتله يا زكريا ب افكرك قتلت كام واحد. بسبب او من غير سبب..
زكريا وقف وقاله
سيبني افكر وارد عليك..
عزيز
قدامك للاسبوع الجاي وتقرر انت هتعمل ايه عشان لو هنشوف غيرك..
_ اتنهد زكريا بضيق ومشي، وعزيز نده لعماد اللي جه ووقف قدامه وقاله..
عماد
تحت امرك يا معلم خير؟..
عزيز بخبث
اختك عامله ايه يا عماد؟..
عماد بقلق
اختي هو انت تعرف اختي منين؟..
عزيز بخبث
سماح قالتلي انها حلوه وكمان انت مش بتشغلها غير للحبايب ولا ايه؟..
عماد بضيق
لا اا اختي دي عيله صغيره ما بتشتغلش اصلاً..
عزيز بخبث
هجيلك واشوف ولا اسأل زكريا عليها؟..
_ تفتكرو هيحصل ايه؟...
ـــــــ #بقلم_الكاتبه_رحاب_القاضي ـــــــ
_ وفي الوقت ده عند جهاد..
اخدتها نورا المطعم اللي قالتلها عليه وبدأت شغل فيه وكانت مرتاحه جداً هناك، وقربت منها بنت من اللي شغالين معاها وقالت..
امنيه
جهاد روحي شوفي الزبون اللي علي ترابيزه سبعه..
جهاد بهدوء
حاضر..
_ وراحت جهاد قربت من الترابيزه اللي كان قااعد عليها المنشاوي وقالت..
جهاد
تحت امرك يا افندم..
بصلها المنشاوي وقال
بسم الله مشاء الله انا اول مره اشوف حد شكله يفتح النفس هنا...
جهاد ابتسمت وقالت
شكرا جداً لحضرتك، حضرتك تطلب ايه؟..
المنشاوي سكت شويه وقالها
والله مش عارف بس انا عايز اتغدي حاجه مختلفه تقترحي عليا ايه؟..
جهاد بتوتر
مم مش عارفه والله، هو حضرتك ليك في البيتزا....
ابتسم المنشاوي وقالها
انتي عندك كام سنه يا بنتي؟..
جهاد
18 سنه..
المنشاوي
ايوه صح نورا قالتلي، تعرفي انتي لولا ظروفك انا مستحيل كنت اخلي بنت اموره وصغيره زيك تشتغل هنا،اناي زمانك في الجامعه دلوقتي..
جهاد بقلق
هو انا عملت حاجه غلط طيب؟..
المنشاوي
يا بنتي ما تخافيش روحي يلا هاتيلي البيتزا بتشكيلة جبن تمام..
جهاد
تمام..
_وراحت جهاد المطبخ وقالتلهم علي الطلب،وقربت منها امنيه وقالتلها..
امنيه
شكلك كده عديتي الاختبار بتاع المنشاوي بيه..
جهاد
اختبار ايه انا مش فاهمه حاجه؟..
_في الوقت ده وقبل ما ترد امنيه موبيلها رن برقم نورا فردت عليها وقالت..
جهاد
ايوه يا طنط..
نورا
اوعي تكوني زعلتي من الحج المنشاوي يا بنت..
جهاد
هو الراجل اللي بره ده حضرتك تعرفيه منين، ده انا حسيت انه ممكن يخليهم يطردوني..
نورا
يا بنتي ده راجل طيب اووي وعلي فكره المطعم بتاعه بس اغلب الاوقات بيكون فيه عم رمزي اللي هو مسؤل عن كل حاجه..
جهاد
هو حضرتك تعرفي الراجل ده منين؟..
نورا
مراته الاولي كانت صحبتي، انا بفالي سنين ما قابلتوش بس انا قصدته علي شغل ليكي وهو وافق..
جهاد
خير ان شاء الله هو باين عليه طيب برضو..
نورا
ربنا معاكي يا حبيبتي ولو احتاجتي حاجه او حاجه حصلت معاكي كلميني..
جهاد
حاضر ان شاء الله ما فيش اي حاجه..
_ وقفلت معاها وراحت كملت شغلها...
_ تفتكرو بقي ايه اللي هيحصل لما جهاد تعرف ان المنشاوي يبقي ابو زكريا وهتعرف ازاي،ولما زكريا يشوفها هيحصل ايه؟؟
_ ويونس وزكريا ايه مصيرهم مع بعض وهيعملو ايه في عمار، وهل زكريا هيوافق يموت طفل صغير؟..
_وجميله وعمار تفتكرو هيحصل معاهم ايه؟..
_واخيراً شهد تفتكرو حياتها هتفضل كده ولا لسه في جديد؟
ــــــــــــــــــــــــــــــــــــــــ
#بقلم_الكاتبه_رحاب_القاضي
